„BEZ PVN” VOLDIKS, KURS DZEIVOJ IZ JUMTA
16.06.2013.
Ar ūtrū albumu, koncertim, sātyslopu i jaunu sastuovu aktivu darbeibu atsuokuse latgalīšu grupa „Bez PVN”. Iz skotuvis radzami jau zynomī bruoli Kristaps i Guntis Rasimi, jim pīsavīnuojs Jurs Vucāns, kas, kai smej grupys bīdri, izduovynuojs Latgolai dzīsmi par opeli, bungys pīspielej grupys „Momend” bundzinīks Normans Bārbals, bet pi basgitarys niu kusteigs i prīceigs radzams Valdis Vucāns ci grupys bīdrim vīnkuorši Voldiks. Kas i kaids ir Valdis? Varbyut leluoka skaidreiba sasarass piec puora vaicuojumim.
KAI DABUOT ALBUMU "REITS"?
10.06.2013.
Suocam digitaluo albuma daleišonu. Kas juodora?
Ka TU gribi dabuot Bez PVN albumu "REITS":
1. Uzroksti iz T-krakla "Bez PVN", nūsabiļdej i atsyuti biļdi myusim! (iz e-postu bezpvn@inbox.lv , ci "draugūs", "facebook").
2. Spīd itai ziņai "like" ci "man patīk"!
3. I mes tev atsyutom BEZ MOKSYS Bez PVN albumu "REITS"!
KONCERTS JŪMYS ĪLYS SVĀTKŪS JIURMOLĀ
24.06.2013.
Ka 6. julī 15:00 nabyusi nūdarbynuots Dzīšmu i deju svātku nūrisēs, prīcuosimīs Tevi redzēt Jiurmolā. Pīsadaleisim Jūmys īlys svātkūs.
„BEZ PVN” ŪTRAIS ALBUMS "REITS" IR PĪDZIMS
07.06.2013.
6. junī Reigā, Dailis teatra uora kopejneicā „Epikūra dārzs” beja grupys „Bez PVN” ūtruo skona īroksta „Reits” atruodeišonys pasuocīņs, iz kuru beja saguojuši gon grupys draugi, gon atbaļsteituoji, gon cyti latgalīšu muzykanti.
Itūreiz nūtikšona nabeja tradicionala albuma prezentaceja deļ tuo, ka grupa izavieliejuse īrokstu izdūt viņ vīnā eksemplarā i magnetiskuos lentys formā. „Bez PVN” dūmoj, ka myusu dīnuos taipat taustamim formatim nav jāgys i albums dzeivoj digitalu dzeivi. Albumā „Reits” atrūnomys 10 dzīsmis, kuru tekstu i muzykys autori ir grupys dalinīki. Vīnys dzīsmis „Grybu dzeivuot” teksta autors ir Ontons Slišans i prezentacejis laikā ari jam tyka syuteiti sveicīni iz dabasu koncertzalu. Gabaleņu magnetiskuos lentys sovā eipašumā varieja dabuot ari kotrs grybātuojs.
PYRMUO RECENZEJA PAR ALBUMU "REITS"!
09.06.2013.
Asam sajūmuši pyrmū recenzeju par grupys jaunū albumu "Reits". Autors - Guntix.
10:13 (AM)....Reits.....podslādzu pa mozam obejis auss... 90-kys ari vēļ cikmer izakuosej, sakrotūt vysus dziernekļus dzinamikūs.. Īzadarbynoj beidzūt Intro. Pazamūst tai iz reizis jāgā i nasaīt,.. pusmīgā kurta šalc ci jiura, ci zaļīs mežs, ci..... NĀ!!! Tī īkšā ir naskas dzeivs!!! Tai vīgļi gaudoj. Pussapynā radzu: suņeic apmaucs T-kraklu ar uzrokstu "U2"dzīd i tai kai muokūneits, smydzynojūt sausūs teirumus, pļivinej viers golvys...
AICYNOJAM IZ ŪTRUO ALBUMA ATRUODEIŠONU
31.05.2013.
Piec puora godu pagreidis perioda ar radzamim muzykalim dorbim iz skotuvis atsagrīzuse grupa „Bez PVN” i 6. junī aicynoj iz grupys ūtruo albuma prezentacejis pasuocīni, kai ari pīduovoj apsavērt video verseju dzīsmei „TYLTS”.
6. junī 19.00 Reigā, Dailis teatra uora kopejneicā „Epikūra dārzs” grupa „Bez PVN” sovus draugus, atbaļsteituojus, fanus, medeju puorstuovus i cytus interesentus prīcuosīs redzēt iz grupys ūtruo albuma „Reits” atruodeišonys pasuocīni.
JAUNS VIDEOKLIPS - DZĪSMEI "TYLTS"
30.05.2013.
„TYLTS” video verseju viestej par cylvāka dzeivis izvielem. Kai akteri, kurim itei ir debeja video muokslā, klipā pīsadalejuši 1 kivi, 1 apeļsins, 1 mandarins i 38 ūlys. Klipu taisejuse apvīneiba „Pagan People Productions”: režisors Guntis Rasims, muokslinīcyskais vadeituojs Raibīs, operators, gaismuotuojs Eduards Medvedevs, producenti „Latgolys Producentu Grupa”. Dzīsmis muzykys autors Kristaps Rasims, vuordu autori Kristaps Rasims i Guntis Rasims, dzīsmis īroksta apstruode – Uģis Vilcāns (mix, LTG) i Nick Dawes (master, FR).
JAUNYS "BEZ PVN" DZĪSMIS ĪROKSTŪS NU "BOŅUKS 2012"
02.04.2013.
2013. gods grupai "Bez PVN" byus jaunu dorbu gods. Ite pyrmais ituo goda dorbs - daleiba Latgalīšu kulturys Goda bolvys "Boņuks 2012" padūšonys ceremonejā 24.02.2013. Rēzeknis nūvoda Bieržgalī. Jiusu viereibai - divejis jaunys dzīsmis "Tylts" i "Viejs".
12. APRELĪ DAUGOVPILĪ FOLK/ROCK SASTUOVĀ
09.04.2013.
Turpmuok grupu "Bez PVN" koncertūs varēsit dzierdēt i redzēt 2 veidu prīkšnasumu koncertstilūs ("standarta" i "folk/rock".
Tod nu D-pilī, jaunūs grupu konkursa vīni nu gostim - "Bez PVN" koncertā uzastuos tīši "folk/rock". Kai tys vyss izaver, redzēsim jau itū 5diņ!
KONCERTS LATGOLYS VIESTNĪCEIBĀ "GORS"
12.05.2013.
Nu 19. maja da 2. juņam Rēzeknē byus Latgolys viestnīceibys "GORS" atkluošonys pasuocīni. 1. junī zam devizis "Te doncoj" vokora koncertā tys gūds uzastuot byus ari grupai "Bez PVN".
Latgolys viestnīceibys "GORS" lelajā zalā uzastuos latgalīšu grupys "Dabasu Durovys" i "Bez PVN", kai ari popularais ukraiņu R'n'B duets Tamerlan i Aļena Omargalieva.
Koncerta suokys 21, biletu cenys Ls 4 īprīškpuordūšonā i Ls 5 pasuocīņa dīnā.
JŪMYS ĪLYS SVĀTKI AIZVADEITI
09.07.2013.
6. julī 15:00 aicynuojom atbraukt iz Jiurmolu i kūpā ar myusim pīsadaleit Jūmys īlys svātkūs. Sokam sirsneigu paļdis vysim, kas atbrauca speciali i tim, kas najauši guoja garum. Paļdis par atbolstu i leidza dzīduošonu! Ūtrū reizi tyka spālāts folk/rock variantā. Jiurmolā beja ari tei rešuo īspieja satikt myusu Portugalis viestnīceibys aktivisti Aiju. Kartenis, kai mes izavierem, apsaveramys Facebook profilā ci ite pat sadaļā "BIĻDIS".
SOLVITYS RECENZEJA PAR ALBUMU "REITS"
12.07.2013.
Grupa "Bez PVN" i albums "Reits" ir sajiemuši vēļ vīnu atsauksmi/recenzeju. Tuos autore ir Solvita Pošeiko nu Rēzeknis Augstškolys. (..) "Pavisam subjektīvi: dziesma „Zuoleite”, manā skatījumā, ir muzikālā un tekstuālā vēstījuma brīnišķīgs apvienojums, fantastisks gabals, ko ir vērts noklausīties vairākas reizes pēc kārtas, novērtējot visas sīkās nianses, kas ir iestrādātas dziesmā. Laikam tieši dziesmu muzikālie ievadi un starpspēles ir visinteresantākie šajā albumā." (..)
LTV1 RAIDEJUMS "CYTAIDI LATVISKAIS"
14.07.2013.
Šudiņ LTV1 ēterā jau trešū reizi beja īspieja nūsavērt jaunū raidejumu "Cytaidi latviskais". Itūreiz par latgalīšu muzyku. Par tū runoj i stuosta ari myusu Guntis i izskaņ ari koč kas nu "Bez PVN" repertuara.
GRUPA "BEZ PVN" IZSUOKUSE IZPLATEIT MUZYKALU NARKOTIKU
24.07.2013.
Kab padareitu pasauli i cylvākus prīceiguokus i smaideiguokus, grupa „Bez PVN” šudiņ suokuse izplateit muzykalu narkotiku – dzīsmi „Zuoleite”, kas atrūnoma grupys ūtrajā albumā „Reits”, kurs publiskā prezentaceja tyka atruodeits juņa suokuos.
GRUPYS "BEZ PVN" VIDEOKLIPS DZĪSMEI "ZUOLEITE"
30.07.2013.
Īprīškejuos nedelis vydā, kab padareitu pasauli i cylvākus smaideiguokus, grupa „Bez PVN” suoce izplateit muzykalu narkotiku – dzīsmi „Zuoleite”, nūsyutūt tū sovim draugim i atbaļsteituojim. Šudiņ grupa pīduovoj nūsavērt dzīsmis videoklipu, kas taiseits nu pīcgadeiga bārna ar teleponu safiļmātuo materiala.
DEJU NAKTS VARAKĻUONŪS
12.08.2013.
17. augustā 23:00 myusim byus tys gūds atkluot Deju nakti Varakļuonu breivdobys estradē. Vēļ pīsadaleis grupys "Forte", "Novadnieki" i c. Īīšonys moksa da 23:00 2 lati, piec tam 3 lati. Esit laiceigi!
MALNS, BOLTS I "BEZ PVN"
11.09.2013.
Vysa vosora myusim aizguojuse kraklu i krekleņu zeimē - kaidys tik variacejis ar "Bez PVN" nav radzātys! Byus kaidu dīnu ari fotogalereja Tovom acim. Bet tikom Līgys krekleņa īdvasmuoti ar Santys, Īvys, Jureiša i UZVELCKREKLU.LV sadarbeibu dabuojom jaunys krekleņus ari poši sev. Nu vyss kai bolts iz malna!
21. SEPTEMBRIS
12.09.2013.
21. septembris myusim byus cīši darbeiga dīna. Byusim gon Latgolys dīnvydūs, gon zīmeļūs. Piec 13:30 pīsadaleisim Daugavpiļs nūvoda dīnuos Daugavpilī, ap 17:30 gastēsim Rogovkā, nu vokorā varēsi satikt "Upītes Uobeļduorzā" Vileks golā.
VOSORYS VIDEO
18.09.2013.
Vosorā beja koncerti i niu pīduovojam vareibu iz tim atsavērt. Myusu YOUTUBE kanalā jauni video nu koncerta Rēzeknis "GORĀ" 1. junī i Jiurmolys Jūmys īlys svātkim 6. julī. Verīs ITE i ITE.
10 GODU JUBILEJS
11.11.2013.
27. decembrī byus paguojuši 10 godi nu breiža, kod pyrmū reizi ar koncertu Kuorsovys Tautys nomā uzastuoja grupa "Bez PVN". Guntis i Kristaps Rasimi, Valdis i Jurs Vucāni, Normans Bārbals - taids ir tādinejais grupys sastuovs, nu itūs godu laikā sovys muzykaluos rūky grupys atteisteibā dalykuši ari Pīters Orinskis, Artūrs Mozors i Aija Repša. Kai niu skaņ "Bez PVN", tū var nūsaklauseit itymā godā izdūtajā albumā "Reits", bet vysys pastuoviešonys laikā grupa bejuse latgalīšu jaunuos paaudzis muziķu i jaunīšu vyspuor īdvasmuotuoja. "Mes dzīžam taidā volūdā, kaidā dūmojam!" - itys sauklis par latgaliskū grupys dzeivē palics namaineigs ari niu.
JUBILEJA KONCERTS KUORSOVĀ
19.12.2013.
Piec četru 10 godu jubilejam veļteitūs koncertu izskaniešonys grupa „Bez PVN” 27. decembrī aicynoj iz nūslāguma koncertu i dzimšonys dīnys svieteišonu Kuorsovā.
2003. goda 27. decembrī Kuorsovā nūtyka latgalīšu grupys pyrmais koncerts, kam par gūdu novembrī i decembrī beja 10. jubilejam veļteitī koncerti Daugavpilī, Rēzeknē, Jelgovā i Reigā. Nūslāguma koncerts byus eistynuos dzimšonys dīnys svieteišona i simboliska atsagrīzšona „Bez PVN” pyrmajā sātys vītā – Kuorsovys kulturys nomā.
Kartenis nu vysim koncertu serejis koncertim apsaveramys sadaļā "BIĻDIS".
BEZ PVN NŪSVIETEJUŠI 10 GODU JUBILEJU
05.01.2014.
Ar dzimšonys dīnys koncerta nūspieliešonu, sveicīnu i duovonu sajimšonu un ļustiešonu vysys nakts garumā nūsaslēdze grupys „Bez PVN” 10 godu jubilejam veļteitais koncertturs. Pyrmī koncerti dažaiduos piļsātuos: Daugovpiļs, Rēzekne, Jelgova i Reiga – kotrs koncerts ar cytaiduoku pīredzi, uzastuošonys vītu, situaceju. Pēdejais koncerts Kuorsovā jau beja koncerts sātā, kur grupa pyrma 10 godu izsuokuse sovys muzykaluos aktivitatis. Kai grupai guoja pyrmajūs četrūs tura koncertūs, varat apsavērt vīnu dzīsmi garā retrospektīvā video.
NOMINACEJA MUZYKYS ĪROKSTU BOLVAI
10.01.2014.
9. janvarī presis konferencē Latvejis Nacionalajā teatrī tyka paviesteiti nominanti Muzykys īrokstu bolvai "Zelta mikrofons". Nominantu vydā tycs ari "Bez PVN" 2013. goda dorbs - albums "Reits", kurs nominacejā "Lobuokais poprock albums" konkurēs ar Donu, The Soung Poets, Laika Suns i Instrumentim. Kompaneja viņ ir tuo vārta, kab byutu par nominantu. Bolvu padūšonys ceremoneja byus 5. martā, tod jau redzēs, kai tī mums īs.
KOLNASĀTYS GOSTI
13.01.2014.
Pošā 2013. goda golā Voldiks, Kips i Normans gasteja LR1 raidejumā "Kolnasāta", kur stuostejom par 10 godu jubileja turu, grupys viesturi, sastuovu, 2014. goda planim i Latgolu. Vysa vydā natryuka ari dzīšmu. Kai tys vyss izaklauseja? Klausīs ITE i ITE.
