top of page
GRUPA
2011. - niu

Piec puora godu klusiešonys (kuru laikā tyka sataiseita i apreikuota skona īrokstu studeja), 2011. goda golā grupa „Bez PVN” atsuoce dorbu pi jaunuo materiala īroksta i produciešonys. Pusūtra goda laikā tyka īraksteitys vaira kai 20 dzīsmis.Leidza ar izmaiņom stilā i skaniejumā 2012. godā grupā nūtyka ari sastuova izmainis. Niu grupys „Bez PVN” pamatsastuovs ir:

Kristaps Rasims - bolss, el. gitara, cyti instrumenti,

Guntis Rasims - bolss, akust. gitara, cyti instrumenti,

Juris Vucāns - bolss, el. gitara, samplers, cyti instrumenti,

Valdis Vucāns - bolss, basgitara, cyti instrumenti,

kai ari naatjemama grupys sastuovdaļa ir grupys "Momend" bundzinīks Normans Bārbals.
2013. godā plašuokai sabīdreibai tyks atruodeiti 2 studejis albumi i vairuoki videoklipi.

​2003. - 2011. gods

Grupa formali suokuse sovu darbeibu 2003. goda 27. decembrī leidza ar nūsaukuma rošonūs i pyrmū oficialū koncertu vītejā Kuorsovys Tautys nomā. Da tam kotra dalinīka muzykaluo pīredze ir viertejama individuali. Pastuoviešonys laikā tei pīsadalejuse vaira kai 500 dažaida mārūga pasuocīņūs, festivalūs i koncertūs.
Tūs skaitā ir daleiba Jaunūs grupu konkursā „Stage No. 1” (Valmīrā), kod 86 grupu konkureņcē tyka dabuotys tīseibys pīsadaleit lobuokūs 20-kā; kai ari tikšona rokmuzykys festivalā „Sinepes un Medus 2005” (Modyunē) konkursa finalā – vairuokuos nominacejuos, „Skateituoju Simpatejis” bolva, „lobuokūs 3-nīks žurejis viertejumā! Pīsadaleišona festivalā „Tu esi pamanīts” (Jiurmolā) finala 10-kā i „Pēdas 2005”, lobuokū 15-nīks.
Vēļ pi sasnīgumim pīskaitoma daleiba Latgolys muzykys festivalā „Muzykys Skrytuļs” 2005, 2006 i 2007 (Leiksnā), „Manc Akorc 2005” (Rēzeknē) i „Osvalds” 2005, 2006 i 2007 (Baļtinovā) eipašūs gostu statusā. Taipat koncertturā pa Latvejis piļsātom projekta – videostuosta „Par sevi, draugim i Latgolu” laikā 2005. godā, „Latgolys muzykys festivals 2009, 2010” (Leivuonā), „Upeitis Uobeļduorzs” (vairuokys reizis suocūt nu 2005. goda) i daudzi cyti festivali Latgolā i uorpus tuos.
Sastuovs da 2011. godam:
Grupys dybynuotuojs i muzykaluo dvēsele ir Kips (Kristaps Rasims), kura īguļdejums nūsaukuma radeišonā i grupys darbeibā ir nanūviertiejams. Vys tik da pat šam breišam nūsaukuma „Bez PVN” eistais zamteksts i atšifriejums plašuokai publikai teik apzynuoti globuots, jo tys var kaitēt cytu jaunūs grupu atteisteibai vaļstī.
Grupys PR tāls ir bejušais „Fabrikys Muzykaluo teatra” i „Daugovpiļs Oranžuo kora” dalinīks daGunchi (Guntis Rasims), kas pa daļai vaineigs grupys atpazeistameibys veicynuošonā; sovulaik dorbuojīs „Latgolys Radejā”.
„Bez PVN” unikalais darejuma punkts ir basgitarys monstrs Aja (Aija Repša), kas nu suoku beja planavuojuse suokt basgitatistis solokarjeru, nu, pasasokūt puorejūs grupys dalinīki uzstuojeibai, iz laiku atsasaceja nu sova plana… Niu Aija dzevoj Portugalē i vysod ir meili gaideita gostūs pi grupys puišim.
Sytamūs instrumentu puorzynuošonu grupā uzajieme (2003. – 2005.) Pichux (Pīters Orinskis) i (2005. – 2011.) Arča (Artūrs Morozs).
Pyrmuo raudzeišona īraksteit sovys dzīsmis nūtyka 2004. goda vosorys golā, nu dažaidu apsvārumu deļ tī sekmejuos viņ pošuos goda beiguos. 2005. goda juļs, augusts tyka pavadeits Siguldys „SSS” studejā, nu 2006. godā ūtruo puse dažaiduos īrokstu studejuos, kur cīteigai nūritieja dorbs pi 2007. goda suokuos izdūtuo debejis albuma „Pyrms Vuorda…”. Albumā tyka īkļautys 16 kompozicejis. „Pyrms Vuorda” tyka izvirzeits „Latvejis Muzykys īrokstu Goda bolvys 2007” nominacejā „goda debeja”. Taipat 2009. godā LR2 „Muzykaluos bankys” goda debitantu tituls dzīsmei „Screen”. Latgalīšu kulturys goda bolvu „Boņuks” grupa sajiemuse 4 reizis – Lobuokais video („Screen”, 2008 i „Jei”, 2009), Lobuokuo dzīsme („Screen”, 2008), Radejis hits („Screen”, 2008).
2007. goda beiguos divejis „Bez PVN” dzīsmis tyka īkļautys ari pyrmajā latgalīšu muokslenīku izlasē „Latgolys Radejis Muzykys izlase”. Grupai ir ari vairuoki videoklipi, pazeistamuokī nu tim dzīsmem „Screen” i „Jei”.

 

bottom of page